
大寶伏藏TD74རྩ་གསུམ་དོན་ཁྲིད་ཀྱི་གསོལ་འདེབས་བཞུགས་སོ། ། རད་གླིང་རྩ་གསུམ། བརྒྱུད་འདེབས།
4-26-1a
༄༅། །རྩ་གསུམ་དོན་ཁྲིད་ཀྱི་གསོལ་འདེབས་བཞུགས་སོ། ། རད་གླིང་རྩ་གསུམ། བརྒྱུད་འདེབས།
༄༅། །རྩ་གསུམ་དོན་ཁྲིད་ཀྱི་གསོལ་འདེབས་བཞུགས་སོ། །ན་མོ་གུ་རུ། དམིགས་མེད་སྤྲོས་བྲལ་བདེ་ཆེན་ཞིང་ཁམས་དེར། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །བློ་འདས་ཆོས་སྐུ་ཐོབ་པར་བྱིན་གྱིས་རློབས། །ཤར་ཕྱོགས་རི་བོ་ཏ་ལའི་ཕོ་བྲང་དུ། །ལོངས་སྐུ་སྤྱན་རས་གཟིགས་ལ་གསོལ་བ་འདེབས། །འོད་གསལ་ལྷུན་གྲུབ་རྟོགས་པར་བྱིན་གྱིས་རློབས། །རྔ་ཡབ་པདྨ་འོད་ཀྱི་གཞལ་ཡས་སུ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །ཚེ་འདིར་རིག་འཛིན་ཐོབ་པར་བྱིན་གྱིས་རློབས། །ཉི་ཤུ་རྩ་བཞི་མཁའ་འགྲོའི་གནས་མཆོག་ཏུ། །མཁའ་འགྲོ་ཡེ་ཤེས་མཚོ་རྒྱལ་ལ༴ བདེ་སྟོང་ཟུང་འཇུག་རྟོགས་པར་བྱིན༴ ཆོས་འཁོར་བདེ་ཆེན་གླིང་གི་ཕོ་བྲང་དུ། །གཏེར་སྟོན་རཏྣ་གླིང་པ་ལ༴ བདག་གཞན་དོན་གཉིས་འགྲུབ་པར་བྱིན༴ སྤྱི་གཙུག་ཉི་ཟླ་པདྨའི་གདན་སྟེང་དུ། །དྲིན་ཆེན་རྩ་བའི་བླ་མ་ལ༴ བདག་རྒྱུད་སྨིན་ཅིང་གྲོལ་བར༴ གནས་མཆོག་ཁྱུང་ཆེན་བྲག་གི་ཤར་ཕྱོགས་སུ། །དམ་ཆོས་རྩ་གསུམ་དོན་ཁྲིད་ལ༴ དངོས་པོའི་གཤིས་ལུགས་རྟོགས་པར༴ ལྷུན་གྲུབ་རྣམ་དག་གསང་བའི་གཞལ་ཡས་སུ། །ཡི་དམ་ཞི་ཁྲོའི་ལྷ་ཚོགས་ལ༴ རང་བྱུང་ལྷུན་གྲུབ་རྟོགས་པར་བྱིན༴ ཕྲིན་ལས་གཏད་རྒྱ་དམ་ཚིག་
4-26-1b
ཕོ་བྲང་དུ། །བཀའ་སྲུང་དམ་ཅན་རྒྱ་མཚོ་ལ༴ ཕྱི་ནང་བར་ཆད་ཞི་བར་བྱིན༴ གར་བཞུགས་འབྲལ་མེད་དག་པའི་གཞལ་ཡས་སུ། །མཆེད་གྲོགས་ཆོས་མཛད་ཡོངས་ལ༴ ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །སྐུ་གསུམ་རང་ངོ་ཤེས་པར་བྱིན་གྱིས་རློབས། གཉིས་འཛིན་བློ་དང་བྲལ་བར་བྱིན༴ དག་སྣང་ཕྱོགས་མེད་འབྱོངས་པར་བྱིན༴ སྒྲུབ་པའི་རྒྱལ་ས་ཟིན་པར་བྱིན༴ འཁོར་བཅས་ཚེ་འདིར་གྲོལ་བར་བྱིན་གྱིས་རློབས། །ཞེས་གསོལ་བ་གདབ་པར་བྱའོ།། །།


